अहमदनगर,दि.१४ जानेवारी,(प्रतिनिधी) – कोणत्याही कारणाने एखाद्या महिलेच्या पतीचे निधन झाले त्यामध्ये त्या महिलेचा काहीच दोष नसतो. समाज त्या महिलेला विधवा म्हणून वेगळ्या नजरेने पाहतो. महत्त्वाच्या ठिकाणी त्या महिलेला प्रवेश दिला जात नाही. मानसन्मान दिला जात नाही. मुळातच त्या महिलांना विधवा न म्हणता एकल म्हणावे. अशा एकल महिलांना मानसन्मान देण्यासाठी संक्रातीला व भविष्यात कायमस्वरूपी एकल ( विधवा) महिलांच्या कडून सुवासिनी महिलांनी हळदीकुंकू लावून घ्यावे व त्यांचे वाण देखील स्वीकारावे असे महत्वाचे आवाहन जगदंब फाउंडेशन व एकल महिला पुनर्वसन समितीच्या माध्यमातून अशोक कुटे व त्यांच्या सहकाऱ्यांनी केले आहे. विविध सामाजिक संस्था, फाउंडेशन व महिला बालकल्याण विभाग यांनी देखील यामध्ये सहभाग घेण्याचे आवाहन करण्यात आले आहे.
गेल्या दोन वर्षापासून हेरंब कुलकर्णी सरांच्या मार्गदर्शनाखाली एकल महिला पुनर्वसन समिती संपूर्ण महाराष्ट्रभर एकल महिलांचे पुनर्वसन करण्याचे व त्यांना समाजात प्रतिष्ठा मिळवून देण्याचे सामाजिक कार्य करत आहेत. हे संपूर्ण कार्य ते कोणतेही अनुदान नसताना करत आहेत. आत्तापर्यंत अनेक महिला, अनेक कुटुंबांचे पुनर्वसन करण्यामध्ये या समितीला यश आले आहे. सोलापूर जिल्ह्यातील सामाजिक कार्यकर्ते प्रमोद झिंजाडे यांनी संपूर्ण महाराष्ट्रभर विधवा सन्मान कायदा राबवण्यात यावा यासाठी मोठी चळवळ उभी केली आहे. प्रमोद झिंजाडे यांच्या मार्गदर्शनाखाली देखील विविध ठिकाणी एकल महिलांचे हळदी कुंकवाचा कार्यक्रम होणार आहे. येत्या रविवारी 15 तारखेला संक्रात आहे. संक्रातीनिमित्त महिनाभर सगळीकडे हळदी कुंकवाचा कार्यक्रम जोरात चालू असतो,परंतु एकल महिलांना कुणीही बोलावत नाही. त्यांच्यासोबत कोणीही हळदी कुंकू करत नाही, म्हणून गावागावात प्रत्येक ठिकाणी या एकल महिलांना बोलवावे. त्यांना मान सन्मान द्यावा त्यांच्यासोबत हळदीकुंकू करावे. त्यांच्यासोबत वाण देवाण-घेवाण करावी, असे आवाहन जगदंब फाउंडेशनचे अध्यक्ष गणेश लंघे, जयश्री कुटे, प्रकाश इथापे, नगर मधील समाजसेविका बेबीताई गायकवाड, अनुरीता झगडे, अंगणवाडी पर्यवेक्षिका संध्या देशमुख मॅडम, बालघर प्रकल्पाचे युवराज गुंड, श्रीकांत सर,आशा साठे, अन्नपूर्णा धम, वैशाली डावरे, मनीषा बारस्कर तसेच एकल महिला पुनर्वसन समितीच्या सर्व सदस्यांनी केले आहे.
महिलांची सर्वात मोठी शत्रू महिलाच आहे. अनेक ठिकाणी सुशिक्षित महिला अशा एकल महिलांचा तिरस्कार करतात. त्यांना कुठे प्रवेश देत नाहीत. सुशिक्षित महिलांमध्ये परिवर्तन होत नाही ही गोष्ट अतिशय निराशाजनक आहे. महिलांनी जर अशा एकल महिलांना समजावून घेतले, त्यांना न्याय दिला तर समाजामध्ये परिवर्तन लवकर घडेल, असे मत अशोक कुटे यांनी व्यक्त केले.
संक्रातीनिमित्त नगर शहरात रविवारी 15 जानेवारीला दुपारी दोन ते चार या वेळेमध्ये महिला अधिकाऱ्यांच्या उपस्थितीत जगदंब फाउंडेशनच्या कार्यालयामध्ये भिस्तबाग चौक पाईपलाईन रोड या ठिकाणी एकल महिलांचा हळदीकुंकू कार्यक्रम ठेवण्यात आलेला आहे. सर्व महिलांनी लाभ घ्यावा.
